Monday, August 27, 2012

அழகு மயிலாட...


அனைவரும் நலம்தானே? கோவை வந்து சேர்ந்து நாட்கள் பறப்பது தெரியாமல் பறக்கின்றன. :)

இங்கே வீட்டருகில் மயில்களின் நடமாட்டம் அதிகமாய் இருக்கிறது. முதலில் பெண்மயில்களை மட்டுமே பார்க்க முடிந்தது. அடுத்து வந்த ஒரு நாளின் மப்பும் மந்தாரமுமான காலைப் பொழுதில் அழகு மயிலின் ஆட்டம் காணும் வாய்ப்புக் கிடைத்தது.

தோகையை விரிக்கத் தயாராகும் மயிலார்! :)




வார்த்தைகள் தேவையில்லாத அழகு மயிலின் ஆட்டம் உங்களின் பார்வைக்கும்..



மயில் கழுத்தின் அற்புதமான வண்ணம்..மந்தகாசமான ஆட்டம்..அதைக் கண்டு ரசித்து கடந்து செல்லும் பெண்மயில்கள்..சீனியர் :) மயிலின் ஆட்டத்தை கண்டு இம்ப்ரெஸ் ஆகி தத்தம் குட்டித் தோகையை விரிக்கும் குட்டி ஆண்மயில்கள்.. என்று மயில் கூட்டத்தின் performance கிட்டத்தட்ட 1/2 மணி நேரம் தொடர்ந்தது. பிறகு மதியமும் ஒரு முறை ஆண்மயில் ஆடினார். வீடியோக்கள்-படங்கள் நிறைய இருகின்றன. சந்தர்ப்பம் கிடைக்கையில் இணைக்க முயல்கிறேன். :)

நன்றி!

Sunday, August 12, 2012

பேப்பர் க்ராஃப்ட்ஸ் - பகுதி 3: பூக்கூடை

அனைவருக்கும் இனிய சுதந்திர தின வாழ்த்துக்கள்! :) "ஆகஸ்ட் 15 வர இன்னும் சிலநாட்கள் இருக்கே, இப்பவே என்ன அவசரம்??" என்று புருவம் தூக்கும் ஆட்கள், வேகமா ஸ்க்ரோல் பண்ணி பூக்கூடை வீடியோவைத் தாவிக் குதிச்சுப் பாருங்க. இல்லன்னா நிதானமா படிச்சுட்டு அங்க போங்க... :))))

தேவையான பொருட்கள்

ப்ரவுன் நிற முக்கோணங்கள் -99
ரோஸ் நிற முக்கோணங்கள் -40
வயலட் நிற முக்கோணங்கள்-60
மொத்த முக்கோணங்கள் - 199

கைப்பிடியின் நீளத்துக்கேற்ப முக்கோணங்களின் எண்ணிக்கை அதிகரிக்கலாம், அதனால் ஒரு 25-50 முக்கோணங்கள் அதிகமாக தயாராக வைத்துக்கொள்ளவும்.

செய்முறை
18 ப்ரவுன் நிற முக்கோணங்களை மூன்று வரிசைகளில் இணைக்கவும்.

இணைத்த வட்டத்தை தலைகீழாகத் திருப்பிவைத்து ஒரு ப்ரவுன் முக்கோணத்தை எடுத்துவிட்டு, பிங்க் கலர் முக்கோணத்தை சொருகவும்.

பிங்க் முக்கோணம் தலைகீழாக (inverted) இணைக்கப்படவேண்டும்
. படத்தைப் பார்த்தால் புரியும்.

இப்பொழுது பிங்க் முக்கோணத்தின் மீது 2 பிங்க் முக்கோணங்கள், அதன் மீது ஒரு பிங்க் முக்கோணம் என இணைக்கவும்.

ப்ரவுன் வரிசையில் முதல் பிங்க் முக்கோணம் இணைத்ததில் இருந்து 2 ப்ரவுன் முக்கோணங்களை எடுத்துவிட்டு அடுத்த பிங்க் முக்கோணத்தை செருகவும். அதன் மீது மீண்டும் 2, 1 என்ற வரிசையில் பிங்க் முக்கோணங்களை இணைக்கவும். இதேபோல ப்ரவுன் வரிசையில் 2 விட்டு ஒரு பிங்க் என தொடர்ந்து இணைத்து முடிக்கவும்.

ஆகமொத்தம் 6 ப்ரவுன் முக்கோணங்களை நீக்கிவிட்டு, 6 பிங்க் முக்கோணடிசைன்கள் கிடைத்திருக்கும்.

இப்பொழுது, 6 பிங்க் முக்கோணங்களில் மூன்றை மட்டும் நீக்கிவிட்டு, அதற்கு பதிலாக வயலட் நிற முக்கோணங்களை செருகிவிடவும். ஆல்டர்னேட்டிவ் ஆக இரண்டு நிறங்களும் கிடைக்கும். [ டைரக்ட்டாகவே பிங்க், வயலட் என மாற்றி மாற்றி இணைக்கலாம், ஆனால் (எனக்கு) குழப்பம் கொஞ்சம் கம்மியாக;) இருக்க வேண்டி இப்படி செய்திருக்கிறேன். :)]

இப்பொழுது மூன்று வயலட் பகுதிகள் மீதும் 7 ப்ரவுன் முக்கோணங்களை படத்தில் உள்ளவாறு இணைக்கவும்.

அடுத்து, 3 பிங்க் நிற பகுதிகள் மீதும் 5 வயலட் நிற முக்கோணங்களை படத்திலுள்ளவாறு இணைக்கவும்.

பூக்கூடை தயாராகிவிட்டது. கூடையின் கடைசி வரிகளை அழுத்தினால் இப்படி உயரமாகும்.

மேலேயுள்ள இதழ்ப் பகுதிகளை லேசாக அழுத்தி, கூடையை அகலப்படுத்தி விடவும்.

அடுத்ததாக கைப்பிடி செய்வது எப்படி என்று பார்க்கலாம். 2 ப்ரவுன்-1 வயலட்-2 ப்ரவுன்-1 வயலட்-2 பிங்க்-1 ப்ரவுன் -2 பிங்க் -1 ப்ரவுன் = மொத்தம் 12 முக்கோணங்களை படத்தில் உள்ளவாறு இணைக்கவும். இது கைப்பிடியின் ஒரு பகுதி, இதே போல ஐந்து அல்லது ஏழு தொகுப்புகள் (விரும்பிய நீளத்துக்கு ஏற்றபடி) இணைத்துக் கொள்ளவும்.

ஏழு கைப்பிடித் தொகுப்புகளையும் இணைக்கவும். வளைவான கைப்பிடி கிடைக்கும். அதன் ஒரு முனையில் இரண்டு pockets இருக்கும், அந்த இடத்தில் ஒரு ப்ரவுன் முக்கோணத்தை இணைக்கவும்.

இப்பொழுது கூடையைத் திருப்பி, அதன் அடிப்பக்கத்தில் 18 பிங்க் நிற முக்கோணங்களை தலைகீழாக (inverted) செருகிவிடவும். இது கூடையின் கீழ்ப்புறம் காலியாக இல்லாமல் இருப்பதற்காக செய்வது.

கூடையின் மேல் கைப்பிடியை இணைக்கவும். ஒரு புறம் ஒற்றை முக்கோணத்தை இணைக்கமுடியும், அடுத்த பகுதில் கூர்மையான இரண்டு முக்கோணங்களை இணைக்கமுடியும்.

கலர்ஃபுல் பூக்கூடை தயாராகிவிட்டது.

என்னால் முடிந்தளவு, எனக்குப் புரிந்தமாதிரி விளக்கம் கொடுத்திருக்கிறேன். இந்தக் கூடை யூட்யூப் வீடியோ பார்த்து செய்தது. கலர் பேப்பர்கள் என்னிடம் இருந்த காம்பினேஷனில் செய்திருக்கிறேன். வீடியோவில் தெளிவான விளக்கம் இருக்கிறது. அதனைப் பார்த்து செய்ய ஆரம்பித்தால் சுலபமாக இருக்கும். குட் லக்! :)



பின்குறிப்பு
ஊருக்குச் செல்வதால் இன்னும் சிலகாலத்துக்கு வலையுலகிற்கு வழக்கம்போல வர இயலாது. அதுவரை இங்கு பதிவுகள் வந்தாலும் வரலாம், வராமலும் இருக்கலாம். அப்பப்ப எட்டிப் பார்த்து கன்ஃபர்ம் பண்ணிக்கோங்க! ;)

என் தொந்தரவு இல்லாமல் எல்லாரும் கொஞ்சநாள் சுதந்திரமா இருங்க! :) மீண்டும் சந்திப்போம், நன்றி வணக்கம்!

Thursday, August 9, 2012

ஸ்டஃப்ட் பாகற்காய் / Stuffed Bitter gourd

தேவையான பொருட்கள்
பாகற்காய்(சிறிய வகை / மிதி பாகல்) - 7
வெங்காயம் -2
சீரகம்-1/2டீஸ்பூன்
சோம்பு-1/2டீஸ்பூன்
மஞ்சள்தூள் -1/4டீஸ்பூன்
மிளகாய்த்தூள் -11/2 டீஸ்பூன்
மல்லித்தூள் -1 டீஸ்பூன்
உப்பு
எண்ணெய்

செய்முறை
பாகற்காயை கழுவி, ஓரங்களை நறுக்கிவிட்டு, நீளவாக்கில் கீறி காயின் உள்ளிருக்கும் விதைகளை அகற்றிவிடவும்.
சுத்தம் செய்த காய்களை உப்பு கலந்த நீரில் கால்மணி நேரம் ஊறவைக்கவும்.

வெங்காயத்தை மிகவும் பொடியாக நறுக்கிக் கொள்ளவும்.
கடாயில் எண்ணெய் காயவிட்டு, சீரகம்-சோம்பு தாளித்து வெங்காயம் சேர்த்து வதக்கவும்.
வெங்காயம் வதங்கியதும் மஞ்சள் தூள்-மல்லித்தூள்-மிளகாய்த்தூள்-உப்பு சேர்த்து வதக்கவும்.
பொடிவகைகளின் பச்சை வாசம் போனதும் அடுப்பிலிருந்து இறக்கி ஆறவிடவும்.

மசாலா நன்கு ஆறியதும், உப்புநீரில் ஊறும் பாவக்காய்களை எடுத்து நீரை வடித்துவிட்டு, காயின் உள்ளே மசாலாவை நிரப்பவும். இதே போல எல்லாக் காய்களிலும் நிரப்பிக்கொள்ளவும்.

இட்லிப் பாத்திரம் அல்லது ஸ்டீமரில் தண்ணீர் கொதிக்கவிட்டு, ஸ்டஃப் செய்த பாகற்காய்களை அடுக்கி வேகவைக்கவும். காய் முழுவதுமாக வேகக் கூடாது. 5 முதல் 8 நிமிடங்களில் நான் வைத்த காய்களை எடுத்துவிட்டேன்.

கடாயில் ஒரு டேபிள்ஸ்பூன் எண்ணெய் காயவைத்து வெந்த பாகற்காய்களை வதக்கவும். குறைவான சூட்டில் காய்களை திருப்பிவிட்டு எல்லாப் பக்கமும் சிவக்கும் வரை வதக்கி எடுக்கவும். சுவையான ஸ்டஃப்ட் பாகற்காய் தயார். சாதம், சப்பாத்திக்கு நன்றாக மேட்ச் ஆகும். கசப்பு-காரம்-வெங்காயத்தின் இனிப்பு என கலவையான சுவை சூப்பராக இருக்கும்.

Recipe Courtesy : Here

Tuesday, August 7, 2012

ஹைக்கிங்..

இரண்டு வாரங்களுக்கு முன்னர் பக்கத்திலிருக்கும் ஒரு ஹைக்கிங் ட்ரெய்ல்-க்கு சென்று வந்தோம், அதிலிருந்து சில படங்கள் + சில நினைவுகளின் தொகுப்பே இந்தப் பதிவு. வேலியோரம் பூத்திருக்கும் ஊமத்தம் பூக்களை ஊரில் பார்த்திருக்கிறேன், இங்கே பார்ப்பது இதுவே முதல்முறை. [ இது ஊமத்தம்பூ தானா என்றும் தெரியாது. நம்ம வசதிப்படி அப்படியே சொல்லிக்கலாம்! :)]

ட்ரெய்ல் ஹெட்-ன் அருகில் இருக்கும் அறிவிப்பு பலகை. சமீபத்தில் இந்த ட்ரெய்லில் ஒரு mountain lion -(மலை சிங்கம்!?!) விஸிட் அடித்துவிட்டு போயிருக்காராம். நியூஸில் சொன்னாங்க..யூ ட்யூபில் வீடியோ கூட இருக்குன்னு நினைக்கிறேன். இவற்றை கண்டால் நேராக நிமிர்ந்து, அசையாமல் நின்னுக்கணுமாம். உயரமான பொருட்களைப் போல நின்றுவிட்டால் அந்த சிங்கம் தன் பாட்டுக்குப் போயிருமாம்! :) வரவழியில் மீட் பண்ணினா(!) ப்ளாகுக்கும் அவரைக் கூட்டிட்டு வரலாம்னு நினைச்சுட்டே போனேன். ஆனா பாருங்க, அவரைப் பார்க்க முடிலை! ;) ஆனால் இந்த அழகான குடும்பத்தினர் எங்கள் பாதையைக் கடந்து போனாங்க..

ஒரு அம்மா, ஒரு குட்டி..கிடுகிடுன்னு பாதையைத் தாண்டிய பிறகும் திரும்பி திரும்பி யாரையோ எதிர்பார்த்தபடியே போனாங்க இவிங்க 2 பேரும்.. திரும்பி வருகையில் மீண்டும் ஓரிடத்தில் கடந்தார்கள், அப்போதுதான் மூன்றாவது ஆள் கண்ணில் பட்டார், அவரும் குட்டி மான்தான்! படமெடுக்க தெம்பு மிச்சமில்லாததால் விட்டுவிட்டேன். ;)

அதன்பிறகு கொஞ்சதூரம் மரநிழல் இருந்தது. பிறகு மொட்டை வெயில்...ஒரு இடத்தில் பாதை இரண்டாகப் பிரிய, நாங்க "road not taken"-ஐ செலக்ட் செய்து மலையேற ஆரம்பிச்சோம். மொட்டை வெயில்..மலைப் பாதையோ நெட்டுக்குத்தா மேலே ஏறுது. ஒதுங்க நிழல் கூட இல்லை. இப்படி ஒரு வழியை செலக்ட் செய்துட்டமேன்னு இருந்தாலும், மெல்ல மெல்ல ஏறினோம்.

சிறிது தூரம் மேலே ஏறியதும் கொஞ்சம் சமமான ஓரிடமும் சில குற்றுச் செடிகளும் வந்தன. அவற்றின் நிழலில் உட்கார்ந்து இளைப்பாறிவிட்டு..
திரும்பிப் பார்க்கையில் அருகிலிருந்த இன்னொரு செடியில் ஜோடிக் குருவிகளும், தேன்சிட்டு ஜோடிகளும் ஏகாந்தமாய் பறந்து திரிந்ததை கொஞ்சம் ரசித்துவிட்டு, கீஈஈஈழே தெரிந்த வீடுகளைப் படமெடுத்துக்கொண்டு கீழே இறங்க ஆரம்பித்தோம்.

மேலே ஏறுவதற்கு எவ்வளவு சிரமமாய் இருந்ததோ, அதற்கு அப்படியே ஆப்போஸிட்டாய் வெகுவேகமாக இறங்கியாச்சு..திரும்பி வருகையில் ட்ரெயிலில் சில பல இடங்களில் கடக்கும் சிற்றோடை வெயிலுக்கு இதமாய் சில்லென்று காற்றை வழங்கியது.

ட்ரெய்ல் ஹெட் கிட்டத்தட்ட முடியப் போகும் இடத்தில் ஓடையின் ஒரு புறமாக...

மணத்தக்காளி செடியேதாங்க! :) நிறையக் காய்களும் பழமுமாக தனியே நின்றிருந்தது. பழங்களைப் பறித்து சாப்பிட்டுவிட்டு, படமும் எடுத்துக்கொண்டு வீடு வந்து சேர்ந்தோம்.

எங்களுடன் அலைந்து திரிந்து வீடு வந்து சேர்ந்ததுக்கு நன்றி! ஃபுல் மீல்ஸ் ரெடி..தெம்பா சாப்பிடுங்க! :)

Friday, August 3, 2012

பேப்பர் க்ராஃப்ட்ஸ் - பகுதி 2 : பூ ஜாடி

மாடுலர் ஓரிகாமி /3D ஓரிகாமி /கோல்டன் வென்ச்சர்-அடிப்படை இணைப்பு

பகுதி 1 -இல் சொல்லியபடி முக்கோணங்களை மடித்துக் கொண்ட பிறகு, அவற்றை இணைக்கவேண்டும். படத்தில் இருக்கும்படி ஒரு முக்கோணத்தின் இரண்டு கூர்மையான பகுதிகளிலும் இரண்டு முக்கோணங்களின் பாக்கெட்களை செருகவும்.

மூன்று முக்கோணங்களும் இணைந்து இப்படியான ஒரு வடிவம் கிடைக்கும். இதுவே அடிப்படையான இணைப்பு. இதில் தேவைக்கேற்ப முக்கோணங்களை இணைத்து விதவிதமான வடிவங்கள் செய்யலாம்.

பெரும்பாலான மாடல்கள் செய்ய இணைப்பு இதே போலதான் இருக்கும். சில நேரங்களில் முக்கோணங்களை தலைகீழாக இணைப்பதுவும் வரும். தேவைப்படுகையில் அப்படி இணைப்பதைப் பார்த்துக் கொள்ளலாம்.


இந்தப் பதிவில் எளிமையான பூஜாடி செய்வது எப்படி என்று பார்க்கலாம். மிகவும் ஈஸியான செய்முறைதான். முயற்சித்துப் பாருங்கள். இந்தப் பூஜாடிக்கான செய்முறை கிடைத்தது ரம்யாவின் ஆர்ட் ப்ளேட்டர் வலைப்பூவில். மிகவும் தெளிவாக செய்முறையைக் கொடுத்திருக்கிறார். அழகான கோலங்கள், அருமையான கைவினைகள் நிறைந்த வலைப்பூ, நேரமிருந்தால் கட்டாயம் போய்ப் பாருங்கள்.
~~~
பூ ஜாடி - தேவையான பொருட்கள்
ரோஸ் நிற முக்கோணங்கள் -91
ஆரஞ்ச் நிற முக்கோணங்கள் -52
மொத்தம் 143 முக்கோணங்கள்
செய்முறை
பூ ஜாடியின் ஒவ்வொரு வரிசையிலும் 13 முக்கோணங்களை இணைக்கவேண்டும், மொத்தம் 11 வரிசைகள். விருப்பமான வண்ணங்களை எடுத்துக்கொள்ளலாம், அல்லது ஒரே கலர் முக்கோணங்களிலும் செய்யலாம். நான் ஆரஞ்ச் மற்றும் பிங்க் வண்ணங்களை எடுத்திருக்கிறேன்.

முதலிரண்டு வரிசைகளும் ரோஸ் நிறம்...

இந்தப் பதிவின் முதலிரு படங்களில் குறிப்பிட்டுள்ள படி முக்கோணங்களை இணைக்க ஆரம்பிக்கவும். தனித்தனியே இரு செட் (13 முக்கோணங்களை) எடுத்துவைத்துக் கொண்டு இணைக்க ஆரம்பித்தால் சுலபமாக இருக்கும்.

முதலிரண்டு வரிசைகள் இணத்ததும் மூன்றாம் வரிசைக்கு அடுத்த நிறத்தை (ஆரஞ்ச்) இணைக்கவும்.

இப்பொழுது மூன்று வரி முக்கோணங்கள் கிடைத்திருக்கும்..

9 வரிகள் வரும் வரை ரோஸ் - ஆரஞ்ச் முக்கோணங்களை மாற்றி மாற்றி ஒவ்வொரு வரியாக இணைத்துக்கொண்டே வரவும்.

5 வரிகள் இணைக்கப்பட்ட நிலையில்...

9 வரிகளும் இணைக்கப்பட்ட நிலையில் மேலே உள்ள வடிவில் பூஜாடி கிடைத்திருக்கும்.

அடுத்தது 10 மற்றும் 11-ஆம் வரிசைக்கு ஆரஞ்ச் நிற முக்கோணங்களை தலைகீழாக இணைக்கவேண்டும்..

இந்த இரண்டு படங்களைப் பார்த்தால் தலைகீழாக இணைக்கப்பட்ட முக்கோணங்களின் வடிவங்களில் உள்ள வித்யாசம் தெரியும்.

மொத்த முக்கோணங்களும் இணைத்து முடித்தபின்னர் பூ ஜாடியை (தேவைப்பட்டால்) கொஞ்சம்
அழுத்திவிடவும்.

அடுத்த படம், "பூ ஜாடி- பறவைப் பார்வையில்!" [Bird's eye view - ;)]

அவ்வளவுதான், நீங்களும் ஒரு மாடுலர் ஓரிகாமி பூ ஜாடி செய்து முடிச்சுட்டீங்க! வாழ்த்துக்கள்! :)))))))

சூரியகாந்தி பூங்கொத்து கடையில் வாங்கியது, வேறு ஃப்ளவர் வேஸ்-ல இருந்து எடுத்து இந்தப் பூ ஜாடியில் வைச்சிருக்கேன். ;) :)
~~~

அடுத்ததாக, கொஞ்சம் முன்கதை சொல்லிவிட்டு பதிவை முடிச்சுக்கறேன். இந்த பேப்பர் ஃபோல்டிங்- செய்ய ஆரம்பிக்கையில் ஏதோ ஒரு ஆர்வத்தில் ஆரம்பித்துவிட்டு, பின்னர் ஆர்வம் குறைந்து எல்லாவற்றையும் மூட்டை கட்டி வைக்கத் தயாராய் இருந்தேன். அப்போழுது ஒரு நட்பூ:) விடுமுறையில் இருந்தார், அவரிடம் பேப்பர் வாங்கியது பற்றி சொல்லிவிட்டேன். விடாது என்னை விசாரித்து, நான் செய்த காமெடி தவறுகளை, நான் அனுப்பும் படங்களில் இருந்து கண்டுபிடித்து, திருத்தி... அப்படி இப்படி என்று ஆன்லைன்ல கோச்சிங் க்ளாஸ் கொடுத்து, வலைப்பூவுக்கு மாடுலர் ஓரிகாமி பதிவுகள் வரும்வரை கொண்டுவந்து சேர்த்தது...இவரேதானுங்க. :)))

இணையத்தில் தேடுகையில் இந்த மாடுலர் ஓரிகாமி பூக்கள் கிடைத்தன. நான் செய்ய முயற்சித்துக் கொண்டே இருக்கிறேன், அவர் வெற்றிகரமாக செய்தே முடித்துவிட்டார். படத்தை வெளியிடுங்கள் என்று சொன்னால் முடியாது என அடம்பிடித்தார். ஏதேதோ சொல்லி ப்ளாக் மெய்ல் செய்து, "தொடருகிறேன், ஒரு வளையம்!" என்று ஒரு பதிவை வெளியிட வைத்தாயிற்று. என்ன ஒண்ணே ஒண்ணு, மெயிலில் வந்த இந்தச் சிவப்புப் பூவை நைஸா;)
(போட்டோல என் ப்ளாக் பேரையும் எழுதி ;)) வெளியிட்டு, 'யார் கை இது, கண்டுபுடிங்க'- என்று ஒரு க்விஸ் வைக்கலாமுன்னு இருந்தேன், மிஸ் ஆகிப் போச்சு! :)))))))))

வெங்காய பஜ்ஜி & டீ!
டீ சூடா கப்பில ஊத்தினதில ட்ரெஸ்(!) போட்டிருக்கு, அட்ஜஸ்ட் பண்ணிக்கிட்டு குடிச்சிருங்க!
அனைவருக்கும் இனிய வார இறுதி!
:)

Wednesday, August 1, 2012

ரசித்து ருசித்தவை - 8


காமாட்சி அம்மாவின் சமையலறையில் இருந்து : சுலப சட்னி

சித்ரா சுந்தர் சமையலறையிலிருந்து : சுரைக்காய்-வேர்க்கடலை கூட்டு

கீதா ஆச்சலின் சமையலறையிலிருந்து : பூண்டு-தக்காளி சட்னி

மீண்டும் காமாட்சி அம்மாவின் சமையலறையிலிருந்து : அரிசிப் பாயசம்

பத்மாவின் சமையலறையிலிருந்து : ஸ்டஃப்ட் பாகற்காய்


LinkWithin

Related Posts with Thumbnails